Fransa hökuməti artan yaşayış xərcləri və inflyasiyaya qarşı Cadılar bayramına təsadüf edən oktyabrın 31-də radikal qrupların zorakılıq çağırışları etdiyini bildirərək, ölkə üzrə 70 min təhlükəsizlik əməkdaşının səfərbər ediləcəyini açıqlayıb.

ERAmedia xəbər verir ki, Fransanın daxili işlər naziri Loran Nunez artan yaşayış xərcləri və əməkhaqları ilə bağlı narazılıqlar fonunda bir sıra şəhərlərdə səfərbərlik çağırışlarının edildiyini bildirərək, şənbə günü mümkün iğtişaşlarla bağlı xəbərdarlıq edib.

Nazir şənbə gününün ictimai asayiş baxımından “çox yüksək riskli” olacağını deyib. O, ölkədə asayişi qorumaq məqsədilə 70 min təhlükəsizlik əməkdaşının yenidən vəzifələrə cəlb ediləcəyini açıqlayıb.

Jurnalistlərə açıqlamasında Nunez bəzi radikal qrupların sosial şəbəkələr vasitəsilə Cadılar bayramına təsadüf edən gün üçün zorakılıq xarakterli toplaşma çağırışları etdiyini bildirib. O, təhlükəsizlik qüvvələrinin bu çağırışlara reaksiyasının “son dərəcə sərt” olacağı barədə xəbərdarlıq edib.

Nazir xüsusilə mərkəzi nümayişlər başa çatdıqdan sonra şənbə axşamı insidentlərin baş verməsi riskinin yüksək olduğunu vurğulayıb.

Nunezin sözlərinə görə, fəhlə hərəkatı, radikallaşmış ifrat solçu qruplar və bəzi radikallaşmış “Sarı jiletlilər” hərəkatına aid internet saytları vasitəsilə oktyabrın 31-i şənbə günü saat 20:00-dan etibarən Fransanın bir sıra şəhərlərində insanları toplaşmağa çağıran çoxsaylı müraciətlər yayılıb.

Nazir həmin çağırışların kifayət qədər radikal mesajlarla müşayiət olunduğunu qeyd edərək, oktyabrın 31-nin ictimai asayiş baxımından ciddi risk daşıdığını bildirib.

Fransa Daxili İşlər Nazirliyi ötən şənbə günü keçirilən yürüşlərdə 70 min polis əməkdaşının xidmətə cəlb edildiyini və aksiyalarda 410 min nəfərin iştirak etdiyini açıqlayıb. Nazirliyin məlumatına görə, bu tədbirlər oktyabrın 17-də bir sıra şəhərlərdə baş verən talan və vandalizm hallarının təkrarlanmasının qarşısını almağa kömək edib.

Həmkarlar ittifaqları və tələbələr isə əməkhaqları, yaşayış xərcləri və dövlət xidmətləri ilə bağlı narazılığın ötən ay səfərbərliyə səbəb olan tələbə hərəkatının çərçivəsini xeyli aşdığını bildiriblər. Onlar oktyabrın 31-də yeni nümayişlər keçirilməsinə, noyabrın 5-də isə ölkə miqyasında tətil təşkil olunmasına çağırış ediblər.

Əli Fərhad