ABŞ-ın Luiziana ştatında yerləşən Penyor gölündə neft axtarışı zamanı baş verən hesablama xətası bölgə tarixinin ən böyük ekoloji və sənaye qəzalarından birinə səbəb olub.

ERAmedia xəbər verir ki, hadisə nəticəsində insan tələfatı qeydə alınmasa da, gölün dərinliyi, suyun tərkibi və ekosistemi köklü şəkildə dəyişib.

Təxminən 3 metr dərinliyə malik şirin su gölündə “Texaco” şirkəti adından qazma işləri aparan mütəxəssislərlə gölün dibində fəaliyyət göstərən “Diamond Crystal” duz mədəninin mühəndislərinin fərqli koordinat sistemlərindən istifadə etdiyi müəyyən edilib. Bu uyğunsuzluq nəticəsində qazma qurğusunun ucu nəzərdə tutulan marşrutdan kənara çıxaraq mədən şaxtalarının üzərindəki qoruyucu qaya təbəqəsini deşib.

Yaranan dəlikdən yeraltı duz mədəninə dolmağa başlayan şirin su duz qatlarını sürətlə əridib. Qısa müddətdə genişlənən boşluq gölün səthində nəhəng burulğanın yaranmasına səbəb olub.

Burulğan qazma platformasını, bir yedək gəmisini və 11 barjanı özünə çəkərək udub. Sahildə yerləşən, əsrlik tarixə malik botanika bağı və istixanalar da torpağın çökməsi nəticəsində su altında qalıb.

Qazma işçilərinin platformanı vaxtında tərk etməsi, eləcə də mədəndə çalışan onlarla işçinin su basması xəbərdarlığından sonra təxliyə olunması sayəsində hadisə insan tələfatı və xəsarətlə nəticələnməyib.

Göldəki suyun mədən boşluqlarına axması nəticəsində Penyor gölünü Meksika körfəzi ilə birləşdirən Delkambre kanalı əks istiqamətdə axmağa başlayıb. Körfəzdən gələn duzlu dəniz suyu yaranmış boşluğa təxminən 46 metr hündürlükdən tökülərək müvəqqəti şəlalə əmələ gətirib.

Bir neçə gün davam edən su dolması və yeraltı təzyiqin tarazlaşmasından sonra batan barjalardan doqquzu yenidən suyun səthinə çıxıb.

Qəza nəticəsində Penyor gölünün dərinliyi təxminən 3 metrdən 60 metrə qədər artıb. Şirin su xüsusiyyətini itirərək duzlu su hövzəsinə çevrilən göldə yerli şirin su faunası tamamilə məhv olub. Bunun əvəzində Meksika körfəzindən gələn dəniz balıqları və digər dəniz canlıları göldə məskunlaşıb.

Böyük maddi ziyana səbəb olan hadisədən sonra bölgədəki duz hasilatı fəaliyyəti tamamilə dayandırılıb.

Vüsalə