XTQ-nin şəhid polkovniki Vüqar Yusifovun doğum günü onun həyat və mübarizə yolunu, ailəsinə aşıladığı vətən sevgisini bir daha yada salır.

ERAmedia xəbər verir ki, 1976-cı ildə dünyaya gələn Vüqar Yusifov 2016-cı ilin Aprel döyüşlərində şəhid olub.

Şəhid zabitin həyat yoldaşı Lalə xanımın xatirələri Vüqar Yusifovun yalnız peşəkar hərbçi deyil, eyni zamanda övladlarının tərbiyəsinə xüsusi diqqət yetirən, milli-mənəvi dəyərləri ailəsində yaşadan bir ata olduğunu göstərir.

Lalə xanımın sözlərinə görə, Vüqar Yusifov hüznlü tarixlərdə, xüsusilə Xocalı soyqırımının anım günündə uşaqlarına Azərbaycanın başına gətirilən faciələr barədə məlumat verirdi. Belə günlərdə ailədə televizor açılmır, uşaqlara tarixi hadisələrin mahiyyəti izah edilirdi. O, övladlarına Azərbaycan Respublikasının Dövlət Himnini və əsgər marşlarını da öyrədirdi.

Hərbçi ata uşaqlarının müharibə və onun nəticələri barədə suallarını cavablandırır, onların baş verənləri anlamasına çalışırdı. Lalə xanımın xatirələrindən aydın olur ki, Vüqar Yusifov övladlarının vətənpərvər ruhda böyüməsini vacib hesab edirdi.

Şəhid polkovnikin ən böyük arzularından biri doğma torpaqların işğaldan azad edilməsi idi. Əslən Cəbrayıl rayonundan olan Vüqar Yusifov bir dəfə Qarabağ və işğal altında olan ərazilər barədə söhbət zamanı həyat yoldaşına doğma yurdla bağlı arzusunu dilə gətirib.

Lalə xanım həmin söhbəti belə xatırlayır: Vüqar Yusifov Cəbrayılın azad edilməsini həyat yoldaşının doğum günü üçün ən böyük hədiyyə kimi təqdim edib. Doğma torpaqların azadlığını şəxsi xoşbəxtliyindən üstün tutan zabitin bu sözləri onun yurd sevgisini ifadə edən unudulmaz xatirələrdən birinə çevrilib.

Lalə xanımın danışdığı digər bir hadisə isə şəhid polkovnikin Şəhidlər xiyabanında söylədiyi fikirlərlə bağlıdır. O, məzarların qarşısında dayanarkən özü də bu cür şəhid olmaq, üzərinə Azərbaycan bayrağının sərilməsini arzuladığını bildirib.

Həyat yoldaşı bu sözlərdən narahat olduğunu, Vüqardan belə danışmamasını istədiyini söyləyir. O, Vüqarın torpaqların azadlığı uğrunda mübarizə aparmasını, qəhrəman kimi yaşamasını arzuladığını bildirir. Həmin vaxt Vüqar Yusifov isə sadəcə gülümsəyib və cavab verməyib.

2016-cı ilin Aprel döyüşlərində şəhid olan polkovnik Vüqar Yusifovun həyat yolu və ailəsinin yaddaşında qalan xatirələri onun Vətənə bağlılığını, doğma torpaqlara qovuşmaq arzusunu və gələcək nəsillərə ötürmək istədiyi dəyərləri əks etdirir.

Onun doğum günü münasibətilə xatırlanan bu həyat hekayəsi bir daha göstərir ki, Vüqar Yusifov üçün Vətən sevgisi yalnız hərbi xidmətin deyil, gündəlik həyatının və ailə tərbiyəsinin də ayrılmaz hissəsi olub.

Vüsalə