ABŞ prezidenti Donald Trampın “Air Force One” təyyarəsi İsveçrəyə getmək üçün havaya qalxdıqdan təxminən bir saat sonra “Joint Base Andrews” bazasına geri dönüb.

ERAmedia-nın məlumatına görə, Ağ Ev sözçüsü Karoline Leavitt bildirib ki, təyyarənin geri dönməsi qərarı uçuşdan sonra “Air Force One” heyətinin “kiçik bir elektrik problemi” aşkar etməsi üzərində verilib.

Təyyarədə olan bir jurnalist qeyd edib ki, qalxışdan qısa müddət sonra mətbuat kabinindəki işıqlar müvəqqəti söndü, lakin dərhal heç bir açıqlama verilməyib. Təxminən yarım saat sonra isə jurnalistlərə təyyarənin geri dönəcəyi bildirilib.

Tramp daha sonra başqa bir təyyarəyə keçərək Dünya İqtisadi Forumu (WEF) iştirakına davam edib. Bu təyyarə adətən prezidentin daha kiçik hava limanlarına etdiyi daxili səfərlərində istifadə olunan modifikasiya edilmiş “Boeing 757″dir.

Hazırda “Air Force One”da xidmət göstərən iki təyyarə təxminən 40 ildir fəaliyyət göstərir. “Boeing” yeni təyyarələrin istehsalı üzərində işləyir, lakin proqram bir sıra gecikmələrlə üzləşib. Təyyarələr prezident üçün müxtəlif sağ qalma tədbirləri, o cümlədən radiasiyadan qorunma və raket əleyhinə texnologiya ilə ağır şəkildə modifikasiya edilib. Bundan əlavə, təyyarələr prezidentin dünyanın hər hansı bir yerindən hərbi qüvvələri ilə əlaqə saxlamasını və əmrlər verməsini təmin edən müxtəlif rabitə sistemlərinə malikdir.

Keçmişdə də oxşar hallar baş verib. 2025-ci ilin fevralında Xarici İşlər naziri Marko Rubionu Almaniyaya daşıyan “Air Force” təyyarəsi mexaniki nasazlıq səbəbindən Vaşinqtona geri dönməli olmuşdu. Oktyabr ayında isə müdafiə naziri Pite Heqsethi daşıyan hərbi təyyarə İngiltərədə qabaq şüşədə yaranan çat səbəbindən fövqəladə eniş etmək məcburiyyətində qalmışdı.

Ural Dəyirmançı