Corcia Meloni Modenada sürücünün avtomobili piyadaların üzərinə sürməsi hadisəsi ilə əlaqədar Kiprə işgüzar səfərini yarımçıq dayandırıb.

ERAmedia xəbər verir ki, bu barədə TASS məlumat yayıb.

Hökumətdəki mənbələrin verdiyi məlumata görə, o, gün ərzində İtaliya Prezidenti Sercio Mattarella ilə birlikdə Modenaya gedərək xəstəxanalarda müalicə alan yaralıları ziyarət etməyi planlaşdırır.

Şəhərin mərkəzində yüksək sürətlə hərəkət edərək insanları vuran şəxsin əslən Mərakeşdən olan və İtaliyada doğulan 31 yaşlı Salim əl-Qudri olduğu müəyyən edilib.

Məlum olub ki, o, psixi pozuntudan əziyyət çəkib və bu səbəbdən qeydiyyatda olub, lakin son vaxtlar lazımi müalicə almayıb.

Hazırda istintaq terror versiyasını əsas istiqamət kimi götürmür, lakin həmin şəxsin bütün əlaqələri araşdırılır. Onun Yaxın Şərqdə baş verən hadisələr fonunda ekstremist baxışları dəstəkləməsi ehtimalı da istisna edilmir.

Hadisə nəticəsində yeddi nəfər xəsarət alıb. Modena rəsmilərinin dəqiqləşdirdiyi məlumata görə, zərərçəkənlərdən ikisinin ayaqları amputasiya edilib.

Cinayətkar qaçmağa cəhd göstərsə də, yoldan keçən şəxslər tərəfindən saxlanılıb. Hadisə yerinə gələn polis əməkdaşları onu bölməyə aparıblar.

Saxlanılarkən hücumçunun üzərindən bıçaq tapılıb. Ona qarşı adam öldürməyə cəhd, çox sayda insana xəsarət yetirmə və soyuq silah saxlama maddələri ilə ittiham irəli sürülüb.

Prokurorluğun ilkin rəyinə əsasən, təqsirləndirilən şəxs küçədə sıxlığın olduğu pik saatlarda insanların həyatını qəsdən və şüurlu şəkildə təhlükəyə atmaq niyyətində olub.