ABŞ-ın Texas ştatında ikinci əl əşyalar alan şəxs evində qutuları açarkən İkinci Dünya müharibəsindən qalma 6 əl qumbarası ilə qarşılaşıb. Hadisə yerinə gələn bomba zərərsizləşdirmə mütəxəssisləri təxminən 80 illik sursatların hələ də partlayıcı xüsusiyyətini qoruduğunu müəyyən ediblər.

ERAmedia xəbər verir ki, ABŞ-ın Ostin şəhərində ev satışından alınan əşyalar qısa müddətdə polis və bomba zərərsizləşdirmə qruplarını hərəkətə gətirib.

Aldığı əşyaları evində yoxlayan şəxs qutulardan birində əl qumbaralarına bənzər sursatlar aşkar edib və dərhal bu barədə hüquq-mühafizə orqanlarına məlumat verib. Hadisə yerinə gələn polis əməkdaşları ərazidə təhlükəsizlik tədbirləri görüblər.

Bundan sonra bomba zərərsizləşdirmə üzrə mütəxəssislər şübhəli sursatları rentgen cihazı vasitəsilə yoxlayıblar. Aparılan araşdırma nəticəsində qutuda 1940-cı illərdən qaldığı ehtimal edilən 6 əl qumbarasının olduğu müəyyənləşdirilib.

Polisin paylaşdığı görüntülərdə sursatların bir qisminin ABŞ istehsalı olan Mk 2 tipli qəlpəli əl qumbaralarına bənzədiyi görünüb.

Mütəxəssislər qumbaraların olduqları vəziyyətdə dərhal təhlükə yaratmadığını, lakin düzgün olmayan şəkildə tutulması və ya yerinin dəyişdirilməsi zamanı partlayış riskinin mövcud olduğunu bildiriblər.

Bomba zərərsizləşdirmə qrupu sursatları təhlükəsiz şəkildə nəzarətə götürərək evdən çıxarıb.

Hadisə ilə bağlı qumbaraları təsadüfən əldə edən şəxs barəsində heç bir tədbir görülməyib. Polis hadisənin təsadüfən baş verdiyini və bununla bağlı hər hansı cinayət araşdırmasının aparılmadığını açıqlayıb.

Əli Fərhad