Avstraliyada müstəqil deputat Helen Heyns Viktoriya ştatının Vanqaratta şəhərində yerləşən seçki dairəsi ofisinin yaxınlığında avtomobilin vurması nəticəsində ağır yaralanıb.

ERAmedia xəbər verir ki, hadisədən sonra ətrafdakı şəxslər sürücünü zərərsizləşdirərək polis əməkdaşları gələnədək nəzarət altında saxlayıblar.

Hadisə bazar ertəsi, yerli vaxtla saat 15:35 radələrində Merfi küçəsində baş verib. Bildirilir ki, Heyns avtomobilinin baqaj hissəsinin yaxınlığında olduğu zaman dörd təkəri də hərəkətə gətirən sistemlə təchiz olunmuş “Toyota Land Cruiser” markalı avtomobil onu vurub.

Polis deputatın təmsil etdiyi seçki dairəsinin ərazisindəki Tarravinqi qəsəbəsində yaşayan 43 yaşlı kişini saxlayıb. Şübhəlinin avtomobilindən bıçaq da götürülüb.

Avstraliyanın Baş naziri Entoni Albaniz hadisənin hakimiyyət orqanları tərəfindən qəsdən törədilmiş hücum kimi qiymətləndirildiyini, lakin onun motivinin hələ məlum olmadığını açıqlayıb. O, istintaqa ölkənin birgə antiterror qrupunun da cəlb edildiyini bildirib.

Albaniz Sidneydə jurnalistlərə açıqlamasında Heynsin həm siyasi dairələrdə, həm də təmsil etdiyi bölgədə böyük hörmət qazandığını vurğulayıb.

Baş nazir deputatı son dərəcə çalışqan və iti zəkalı siyasətçi kimi xarakterizə edib. O, Heynsin ən mühüm xüsusiyyətlərinin dürüstlüyü və yüksək mənəvi keyfiyyətləri olduğunu qeyd edib. Albaniz əlavə edib ki, deputat parlamentdə və onunla tanış olan insanlar arasında hörmət qazanıb, cəmiyyət tərəfindən sevilən bir şəxsdir. Baş nazirin sözlərinə görə, hadisə bölgə sakinləri üçün böyük şok olacaq.

Viktoriya polisi Heynsin vəziyyətinin kritik olduğunu və müalicə üçün hava yolu ilə Melburn şəhərinə aparılmasının gözlənildiyini bildirib. Polis hadisə yerinin geniş ərazini əhatə etdiyini qeyd edərək araşdırmanın davam etdiyini açıqlayıb.

Səlahiyyətli qurumların məlumatına görə, hazırda başqa şəxslərə və ya ictimaiyyətə qarşı davam edən təhlükənin mövcudluğunu göstərən hər hansı kəşfiyyat məlumatı yoxdur. Polis hadisəni hələlik ayrı-ayrı xarakter daşıyan hücum kimi araşdırır.

İstintaqın cəmi bir neçə saat əvvəl başladığını bildirən Albaniz davam edən araşdırma ilə bağlı əlavə şərh verməkdən çəkinib. Bununla belə, o, əvvəlki açıqlamalarına istinad edərək siyasi ritorikada gərginliyin azaldılmasına çağırışını təkrarlayıb.

Helen Heyns 2019-cu ildən etibarən Viktoriya ştatındakı İndi seçki dairəsini təmsil edir. Deputata qarşı hücumun səbəbi hələlik açıqlanmayıb. Şübhəli şəxsin polis nəzarətində olduğu hadisə ilə bağlı araşdırma davam edir.

Əli Fərhad