Ermənistan hökuməti müəyyən kateqoriyadan olan vətəndaşlar üçün müddətli həqiqi hərbi xidmətə çağırış üzrə yuxarı yaş həddinin 32 yaşadək artırılmasını nəzərdə tutan qanun layihəsini bəyənib.

ERAmedia “Kazinform”a istinadla xəbər verir ki, dəyişikliklər dünyanın ən yaxşı 100 universitetinin yer aldığı Dünya Universitetlərinin Akademik Reytinqinə (ARWU) daxil olan ali təhsil müəssisələrində bakalavriat, magistratura və ya aspirantura səviyyələri üzrə əyani təhsil alan vətəndaşlara şamil ediləcək.

Təhsillərini başa vurduqdan sonra onlar Ermənistan hökumətinin müəyyən etdiyi sahələrdə ən azı üç il işləməli olacaqlar. Bu sahələrə təhsil və elm, dövlət idarəçiliyi, hərbi sənaye, yüksək texnologiyalar, səhiyyə və maliyyə daxildir.

Bu şərti yerinə yetirən vətəndaşlar müddətli həqiqi hərbi xidmət keçməkdən azad edilə biləcəklər.

Qanun layihəsinə əsasən, müvafiq çağırış kampaniyası dövründə 32 yaşı tamam olan vətəndaşlar da hərbi xidmətə çağırılacaqlar.

Sənəd baxılması üçün Ermənistan Milli Məclisinə təqdim ediləcək. Qanun qəbul olunacağı təqdirdə, rəsmi dərc edildiyi gündən sonrakı gün qüvvəyə minəcək.