Azərbaycan teatr və kino sənətinin yadda qalan simalarından olan Xalq artisti Əliağa Ağayevin həyat yolu çətinliklərlə yanaşı, maraqlı və yaddaqalan hadisələrlə də zəngin olub.

ERAmedia xəbər verir ki, aktyorun yaradıcılıq fəaliyyəti ilə bağlı xatirələrdə onun uşaqlıq illərindən səhnə həyatına qədər keçdiyi yolun bir sıra maraqlı məqamları üzə çıxır.

Kinorejissor, kinoşünas Aydın Kazımzadənin xatirələrinə görə, Əliağa Ağayevin oğlu Vaqif onunla eyni sinifdə təhsil alıb. Müəllimin tez-tez Əliağa Ağayevi oğluna görə məktəbə çağırması isə sinifdə xüsusi maraq doğururmuş. Aktyor sinfin qapısından içəri daxil olub icazə istəyəndə şagirdlərin üzündə təbəssüm yaranırmış. Səbəb isə sadə idi: uşaqlar məşhur aktyoru görməkdən xüsusi zövq alırdılar.

Əliağa Ağayevin ilk arzularından biri ali təhsil almaq olub. Lakin ailəsinin ağır vəziyyəti onun həyat planlarını dəyişib. O, yeddinci sinifdən sonra təhsilini davam etdirmək əvəzinə çilingərlik texnikumuna daxil olub.

Aydın Kazımzadənin bildirdiyinə görə, aktyorun ailəsi ciddi sınaqlarla üzləşib. Əliağa Ağayevin atası 1918-ci il hadisələri zamanı öldürülüb, anası isə sonradan görmə qabiliyyətini itirib. Bu səbəbdən gələcək aktyor erkən yaşlarından ailənin yükünü bölüşməli olub.

Peşə fəaliyyətinə də məhz çilingərliklə başlayan Əliağa Ağayev bir müddət gəmidə işləyib. Lakin onun səhnəyə marağı həmin illərdə də özünü göstərib. Yaşıdları ilə gəmidə müxtəlif tamaşalardan səhnələri məşq edən aktyor bir dəfə məşq zamanı dənizə də düşüb. Səhnə yoldaşlarının onu tutmalı olduğu epizod baş tutmayınca Əliağa Ağayev suya yuvarlanıb. Hadisədən sonra gəmi kapitanı bu cür məşqlərin dayandırılmasını tələb edib.

Onun peşəkar teatr fəaliyyəti isə 1936-cı ildən Gənc Tamaşaçılar Teatrında başlayıb. Burada Əliağa Ağayev özünəməxsus oyun tərzi və improvizələri ilə seçilib.

Aktyorun səhnədə mətnə əlavə sözlər qatması da onun yaradıcılıq üslubunun xüsusiyyətlərindən biri olub. Bəzən bu improvizələr rejissorlarla fikir ayrılığına səbəb olurmuş. Belə hallardan birində rejissor Tofiq İsmayılov Əliağa Ağayevin əlavələrinin qarşısını almağın mümkün olmadığını görərək ona: “Necə bilirsən, elə də söz artır”, – deyib.

Əliağa Ağayevin həmkarlarına münasibəti də xatirələrdə xüsusi yer tutur. Bir tamaşadan əvvəl xəstələndiyi düşünülərək onun roluna Ələsgər Məmmədoğlunun hazırlanması planlaşdırılıb. Lakin tamaşanın başlamasına az qalmış Əliağa Ağayev teatra gəlib və səhnəyə özü çıxıb.

Aktyor Ələsgər Məmmədoğluna zarafatla münasibət bildirsə də, onu qucaqlayıb öpüb. Daha sonra isə rejissor Mərahim Fərzəlibəyovdan Ələsgərin onun üçün dublyor kimi hazırlanmasını xahiş edib. Ələsgər Məmmədoğlu da ömrünün sonuna qədər Əliağa Ağayevin dublyoru olması ilə fəxr edib.

Əliağa Ağayevin yumoru yalnız səhnə ilə məhdudlaşmayıb. Onun gündəlik həyatda da zarafatcıl və qeyri-adi davranışları ilə yadda qaldığı bildirilir. Hətta aktyorun yaxşı yemək bişirdiyi, xüsusilə xaşıl hazırlamaqda mahir olduğu, bəzən gecələr xingəl bişirdiyi barədə də xatirələr var.

Onun həyatında ağrılı hadisələr də az olmayıb. Aktyorun həmkarı Rafiq Əzimov Əliağa Ağayevin faciəvi şəkildə vəfat edən aktyor Ağadadaş Qurbanovun yas mərasimində keçirdiyi sarsıntını xatırlayaraq, onu heç vaxt belə ağır vəziyyətdə görmədiyini bildirib.

Bütün bu xatirələr Əliağa Ağayevin yalnız səhnədə yaratdığı obrazlarla deyil, həyatdakı xarakteri, güclü yumoru, həmkarlarına münasibəti və çətinliklər qarşısında formalaşan iradəsi ilə də Azərbaycan teatr tarixində özünəməxsus iz buraxdığını göstərir.

Əli Fərhad