İranın paytaxtı Tehranda gecə saatlarında göydə parlaq və işıqlı bir cisim müşahidə olunub.

ERAmedia xəbər verir ki, müəyyən bir nöqtədə sabit qaldığı və zaman-zaman yavaş şəkildə istiqamətini dəyişdiyi görünən cisim şəhər sakinləri arasında maraq və həyəcan yaradıb.

Havada müşahidə olunan obyektin pilotsuz uçuş aparatı, kommersiya təyyarəsi və ya digər hərbi platforma olub-olmadığı məlum deyil. İranlı rəsmilər cismin uçuş hündürlüyü, xarakteri və dəqiq yerləşmə nöqtəsi ilə bağlı hələlik hər hansı rəsmi açıqlama verməyiblər.

Naməlum cismin UNO (Uçan Naməlum Obyekt) kimi təsnif edilib-edilməyəcəyi də hazırda qeyri-müəyyən olaraq qalır.

Tehran səmasında qeydə alınan görüntülər bölgədə təxminən yarım əsr əvvəl baş vermiş məşhur hərbi hadisəni də xatırladıb. 19 sentyabr 1976-cı ildə Şemiran bölgəsində oxşar bir cismin müşahidə edildiyi barədə məlumat daxil olduqdan sonra İran İmperator Hərbi Hava Qüvvələrinə məxsus iki F-4 Phantom qırıcısı havaya qaldırılmışdı.

ABŞ rəsmiləri tərəfindən məxfiliyi aradan qaldırılmış UFO sənədlərində də əksini tapan həmin hadisə zamanı cismə yaxınlaşan ilk F-4 qırıcısında rabitə və idarəetmə panellərinin qəfil sıradan çıxdığı bildirilmişdi. Təyyarə istiqamətini dəyişdikdən sonra sistemlərin yenidən normal fəaliyyət göstərdiyi qeyd olunmuşdu.

Hadisə yerinə göndərilən ikinci qırıcının ekipajı isə əsas obyektdən ayrılan daha kiçik bir cisim müşahidə etdiyini bildirmişdi. Kiçik obyektə tam kilidlənmə həyata keçirildiyi anda təyyarənin silah idarəetmə və rabitə sistemlərinin işləmədiyi qeyd edilmişdi.

Əli Fərhad